EL NICAN MOPAUA
EN NÁHATL, LENGUA AZTECA
1 Nikan mopoua, motekpana, in kenin yankuikan ueytlamauisoltika monexiti in senkiska ichpochtli Sankta Maria Dios Inantsin tosiuapilatokatsin, in onkan Tepeyakak, moteneua Guadalupe.
2 Akattopa kimottititsino se maseualtsintli itoka Juan Diego; Au santenpan monexiti in Itlasoixiptlatsin in ixpan yankuikan Obispo Don Fray Juan de Zumarraga.
3 Ye yu matlak xiuitl in opeualok in atl in tepetl Mexiko, in ye omoman in mitl in chimali, in ye nouian ontlamatkamani in auakan in tepeuakan.
4 in maka san ye opeu, ye xotla, ye kueponi in tlaneltokilistli, in iximachokatsin in Ipalnemouani, neli Teotl Dios.
5 In uel ijkuak in ipan xiuitl mil y kinientos y treinta y uno, kin iu ikeskiluiok in metstli Disiembre mochiu: onkatka se maseualtsintli iknotlapalsintli.
6 itoka katka Juan Diego, iu mitoa ompa chane Kuautitlan,
7 au in ika Teoyotl , ok mochompa pouia in Tlatilolko.
8 Au Sabado katka, uel ok youatsinko, kiualtepotstokaya in Teoyotl iuan in inetititlanis.
9 Au in asiko in inauak tepetsintli in itokayokan Tepeyakak, ye tlatlalchipaua,
10 konkak in ikpak tepetsintli kuikoa, yukin nepapan tlasototome kuika; kakauani in intoski, iukin kinanankilia tepetl, uel senka teyolkima, teuelamachti in inkuik, kisenpanauia in koyoltototl, in tsinitskan iuan in oksekin tlasototome ik kuika.
11 Kimotstimokets in Juan Diego, kimolui: «—¿Kuix noluil, kuix nomaseual in ye nikkaki ¿Aso san niktemiki ¿Aso san nikkochitleua
12 ¿Kanin ye nika, kanin ye ninotta ¿Kuix ye onkan in kitoteuake ueuetke tachtouan tokokoluan, in xochitlalpan in tonakatlalpan, kuix ye onkan in iluikatlalpan »
13 Ompa on itstikaya in ikpak tepetsintli in tonatiu ikisayampa, in ompa ualkistia in iluikatlasokuikatl.
14 Au in oyuseutikis in kuikatl, in omokaktimoman in yeekikaki ualnotsalo in ikpak tepetsintli, kiluia: «—Juantsin, Juan Diegotsin».
15 Niman san yemotlapaloa inik ompa yas in kanin notsalo, aken mochiua in iyolo, manose itla ik misauia, yese uel paki uelamachtia; kitlekauita in tepetsintli ompa itstia in kampa ualnotsalok,
16 au in ye asitiu in ikpak tepetsintli, in ye okimottili se Siuapili onkan moketsinotikak,
17 kiualmonochili inik onyas in inauaktsinko.
18 Au in oyuasito in ixpantsinko, senka kimomauisalui in kenin uelasenpanauia in ik senkiska mauistikatsintli;
19 in itlakentsin yukin tonatiu ik motonameyotia, inik pepetlaka;
20 au in tetl in texkali in ik itech moketsa, inik kimina;
21 in itlanexyotsin yuki in tlasochalchiuitl, makistli, in ik nesi;
22 yukin ayaukosamalokuekueyoka in tlali.
23 Au in miskitl, in nopali iuan oksekin nepapan xiutototin onkan mochichiuani yukin ketsalistli, yuki in teoxiuitl in iatlapalo nesi. Au in ikuauyo, in iuitsyo, in iauayo yuki in kostikteokuitatl ik pepetlaka.
24 Ixpantsinko mopechtekak, kikak in iyotsin in itlatoltsin in uel senka teuelamachti in uel tekpiltik yuki in kimokokonauilia, kimotlatlasotilia.
25 Kimoluili: «—Tlaxikkaki noxokoyou Juantsin, kampa in timouika »
26 Au in yeuatl kimonankilili: «—Notekuiyoe Siuapile, Nochpochtsine, ka ompa nonasis mochantsinko Mexiko Tlatilolko, nokontepotstoka in teoyotl, in techmomakilia, in techmomachtilia in ixiptlauan in Tlakatl in Totekuiyo, in toteopixkauan».
27 Niman ye ik kimononochilia, kimixpantilia in itlasotlanekilistsin,
28 kimoluilia: «Maxikmatti, ma uel yu ye in moyolo, noxokoyou, ka neuatl in nisenkiska semikak Ichpochtli Sankta Maria, in Inantsin in uel neli Teotl Dios, in Ipalnemouani, in Teyokoyani, in Tloke Nauake, in Iluikaua, in Tlaltikpake. Uel nikneki, senka nikeleuia inik nikan nechkechiliske noteokaltsin,
29 in onkan niknextis, nikpantlasas.
30 Niktemakas in ixkich notetlasotlalis, noteiknoitlalis, in notepaleuilis, in notemanauilis,
31 Ka nel neuatl in namoiknouakanantsin,
32 in teuatl iuan in ixkichtin in ik nikan tlalpan ansepantlaka,
33 iuan in oksekin nepapantlaka, notetlasotlakauan, in notech motsatsilia, in nechtemoa, in notech motemachilia,
34 ka onkan nikinkakilis in inchokis, in intlaokol, inik nikyektilis nikpatis in ixkich nepapan innetolinilis, intoneuis, inchichinakilis.
35 Au inik uelneltis in niknemilia in noteiknoittalis ma xiau in ompa in itekpanchan in Mexiko Obispo, au tikiluis in kenin neua nimitstitlani inik tikixpantis in kenin uel senka nikeleuia inik nikan nechkalti, nechkechili in ipan in tlalmantli noteokal; uel moch tikpouilis in ixkich in otikittak, otikmauiso, iuan in tlein otikkak.
36 Au ma yu ye in moyolo ka uel niktlasokamattis, au ka nikixtlauas
37 ka ik nimitskuiltonos, nimitstlamachtis,
38 iuan miek onkan tikmaseuaik nikkuepkayotiin mosiauilis, in motekipanoliin ik tiknemilitiu in tlein nimitstitlani.
39 Okayeotikkak, noxokoyou, in niiyo, in notlatol; ma ximouikatiu, ma ixkich motlapal xikmochiuili.»
40 Au niman ik ixpantsinko onmopechtekak, kimoluili: «—Notekuiyoe, Siuapile, ka ye niyau inik nikyektilis in miiyotsin in motlatoltsin, ma ok nimitsnotlalkauili in nimoknomaseual».
41 Niman ik ualtemok inik kineltilitiu in inelitlanis: konnamikiko in kuepotli, ualamelaua Mexiko.
42 In oasiko itik altepetl, niman ik tlamelau in itekpanchantsinko Obispo, in uel yankuikan ualmouikak Teopixkatlatoani, itokatsin katka D. Fray Juan de Sumarraga, San Fransisko Teopixki.
43 Au in oasito niman ik moyeyekoa inik kimottilis, kintlatlautia in itetlayekoltikauan in itlanenkauan, inik konittotiue;
44 ye achi uekautika in konnotsako, in ye omotlanauatili in Tlatouani Obispo inik kalakis.
45 Au in onkalak niman ixpantsinko motlankuakets, mopechtekak, niman ye ik kimixpantilia kimopouilia in iiyotsin in itlatoltsin Iluikak Siuapili in inetitlanis: noiuan kimoluilia in ixkich okimauiso, in okittak, in okikak.
46 Au in okikak in mochi itlatol, inetitlanis, yukin amo senka monelchiutsino,
47 kimonankili, kimoluili: «—Nopiltse ma okseppa tiualas, ok iuian nimitskakis, uel ok itsinekan nikittas, niknemilis in tlein ik otiuala in motlanekilis, in motlaeleuilis».
48 Ualkis; tlaokoxtiuits, inik amo niman oneltik in inetitlanis.
49 Niman ualmokuep is sa ye ikuak ipan semiluitl; niman onka ualamelau in ikpak tepetsintli,
50 au ipantsinko asito in Iluikak Siuapili, is san ye onkan in kanin akattopa kimottili, kimochialitika.
51 Au in oyukimottili, ixpantsinko mopechtekak, motlalchitlas, kimoluili:
52 «—Notekuiyoe, Tlakatle, Chiuapile, Noxokoyoue, Nochpochtsine, ka oniuia in ompa otinechmotitlanili, ka onikneltilito in miiyotsin in motlatoltsin; masiui in ouiuitika in onikalak in ompa iyeyan in teopixkatlatoani, ka onikittak, ka oixpan niktlali in miiyotsin in motlaltotsin in yu otinechmonanauatili,
53 onechpakkaseli, au okiyekkak; yese inik onechnankili yukin amo iyolo omasik, amo monelchiua.
54 .—Onechilui: —Okseppa tiualas, ok iuiyan nimitskakis, uel ok itsinekan nikittas in tlein otiuala, motlayeleuilis, motlanekilis.
55 .—Uel itech onikittak in yu onechnankili ka momatti in moteokaltsin tikmonekiltia mitsmochiuililiske nikan, aso san neuatl nikyoyokoya, akasomo motenkopatsinko;
56 ka senka nimitsnotlatlautilia Notekuiyoe, Siuapile, Nochpochtsine, manoso aka seme in tlasopipiltin, in iximacho, in ixtilo, in mauistilo, itech xikmokauili in kitkis in kiuikas in miiyotsin in motlaltoltsin inik neltokos.
57 Ka nel niknotlapaltsintli, ka nimekapali, ka nikakaxtli, ka nikuitlapili, ka natlapali, ka nitko ka nimamaloni, kamo nonenemian, kamo noneketsayan in ompa tinechmiualia, Nochpochtsine, Noxokoyoue, Tlakatle. Siuapile.
58 Ma xinechmotlapopoluili niktekipachos in mixtsin in moyolotsin, ipan nias, ipan niuetsis in mosomatsin in mokualantsin, Tlakatle, Notekuiyoe».
59 Kimonankilili in Senkiska Mauisichpochtsintli:
60 «Tlaxikkaki noxokoyou ma uel yu ye in moyolo kamo tlasotin in notetlayekoltikauan in notititlanuan, in uel intech nikkauas in kitkiske in niiyo in notlatol, in kineltiliske in notlanekilis:
61 yese uel yu moneki inik uel teuatl ik tinemis, ipan titlatos, uel momatika neltis, mochiuas, in nosialis, in notlanekilis.
62 Au uel nimitstlatlautia noxokoyou, iuan nimitstlakuaunauatia ka uel okseppa tias in mostla tikittatiu in Obispo.
63 Au nopampa xiknemachti, uel yu xikkakiti in nosialis, in notlanekilis, inik kineltilis inik kichiuas noteokal nikitlanilia.
64 Iuan uel okseppa xikilui in kenin uel neuatl nisemikak Ichpochtli Sankta Maria in niinantsin Teotl Dios in ompa nimitstitlani».
65 Au in Juan Diego kimonankilili kimoluili: —«Notekuiyoe, Siuapile, Nochpochtsine, makamo niktekipacho in mixtsin in moyolotsin, ka uel nosenyolokakopa nonyas, nokonneltilitiu in miiyotsin in motlatoltsin ka niman amo niknokakaualtia, manose niktekokokamatti in ojtli.
66 Ka nonyas nokonchiuatiu in motlanekilistsin, san uel ye in aso kamo niyekkakos; in tlanose ye onikakok akasomo nineltokos.
67 Ka tel mostla ye teotlak in ye onkalaki tonatiu nikkuepakiu in miiyotsin in motlatoltsin in tlein ik nechnankilis in Teopixkatlatoani;
68 Ka ye nimitsnotlalkauilia, Noxokoyoue, Nochpochtsine, Tlakatle, Siuapile, ma ok ximoseuitsino».
69 Au niman ik in ya ichan moseuito.
70 Au in imostlayok Domingo, uel ok youatsinko tlatlayouatok, ompa ualkis in ichan ualamelau in Tlatilolko, kimattiuits in teoyotl iuan inik tepoualos: niman ye inik kittas Teopixkatlatoani.
71 Au aso ya ipan matlaktli jora in onesenkaualok inik omokak Misa, iuan otepoualok, in ualxin in ixkich maseuali.
72 Au in yeuatl Juan Diego niman ik ya in itekpanchantsinko in Tlatoani Obispo.
73 Au in oasito ixkich itlapal okichiu inik okimottilis; au uel ouitika in okseppa kimottili;
74 ikxitlantsiko motlankuakets, choka, tlaokoya in ik kimononochilia, in ik kimixpantilia in iiyotsin in itlatoltsin in Iluikak Siuapili,
75 inik aso sanen neltokos in inetitlanis in itlanekilistsin Senkiska Ichpochtli, inik kimochiuililiske, inik kimokechililiske in iteokaltsin in kanin omotlateneuili in kanin kimonekiltia.
76 Au in Tlatoani Obispo uel miak tlamantli inik kitlatlani, kitlatemoli, inik uel iyolo masis, kampa in kimottili, kenamekatsintli; uel moch kipouilili in Tlatoani Obispo.
77 Au masiui in uel moch kimomelauilili in yukatsintli, iuan in ixkich okittak, okimauiso inka uel yu nesi ka Yeuatsin is Senkiska Ichpochtsintli in Itlasomauisnantsin in Totemakixtikatsin Totekuiyo Jesukristo;
78 yese amo niman ik omonelchiu.
79 Kito ka amo san ika itlatol itlaitlanilis mochiuas moneltilis in tlein kitlani,
80 Ka uel ok itla ineska moneki inik uel neltokos in kenin uel Yeuatsin kimotitlanilia in Iluikak Sipuapili.
81 Au in oyukikak in Juan Diego kimoluili in Obispo:
82 «Tlakatle, Tlatoanie, ma xikmottili katleuatl yes in ineska tikmitlanilia ka niman niyas nikitlanililitiu in Iluikak Siuapili onechualmotitlanili.»
83 Au in okittak in Obispo ka uel monelchiua ka niman atle ik meleltia, motsotsona, niman ik kiua.
84 Au in ye uits, niman ik kinmonauatili keski in ichantlaka, in uel intech motlakaneki, kiualtepotstokaske, uel kipipiaske kampa in yau, iuan akin konitta konnotsa.
85 Tel iu mochiu. Au in Juan Diego niman ik ualamelau, kitokak in kuepotli.
86 Au in kiualtepotstokaya onkan atlautli kisa inauak Tepeyakak, quaupantitlan kipoloko, manel ok nouian tlatemoke aokkan kittake.
87 San yu ualmokuepke, amo saniyo in ik omoxixiutlatito, noiuan ik okimelelti okinkualankakuiti.
88 Yu kinonotsato in Tlatoani Obispo, kitlauelalilike inik amo kineltokas, kiluike inik san konmostlakauilia, san kipipiki in tlein kiualmoluilia, anose san okitemik, san okikochitleu in tlein kimoluilia in tlein kimitlanililia;
89 Au uel yu kimoluike intla okseppa ualas, mokuepas, onkan kitsitskiske, iuan chikauak kitlatsakuiltiske inik aokmo seppa istlakatis, tekuamanas.
90 In okixkichika Juan Diego kakta ixpantsinko Semikak Ichpochtsintli, kiluiaya itenankililis in kitkilito itenkopa Uey Teopixkatlatoani;
91 in oyukimokakilti in Tlatokasiuapili kilui:
92 «—Ka ye kuali, ka ye yuki, noxokoyou, nikan mostla okseppa tiualas inik tikitkilitiu Uey Teopixki in tlaneltilistli in neskayotl in mitstlatlanilia;
93 Ik niman mitstlatolkakilis, iuan itechpa ayokik mitschikomattis, nion motech chikoyolouas;
94 Iuan ma uel yu ye in moyolo, noxokoyu, ka nimitstlaxtlauis monetlakuitlauilis, motlatekipanolis mosiammikilis, in nopampa titlapopolotok.
95 Tlakuele, notelpotsin, ka tel mostla ye nikan nimitsonchixtos».
96 In imostlayok Lunes in ikuak kiuikaskia in Juan Diego in itla ineska inik neltokos aokmo oualmokuep:
97 Ye ika in ikuak asito in ichan, se itla, itoka Juan Bernardino, oitechmotlali in kokolistli, uel tlanautok.
98 Ok kitisinochilito, ok ipan tlato, yese aokmo inman, ye uel otlanau:
99 Au in ye youak, kitlatlauti in itla in ok youatsinko, ok tlatlayouatok ualkisas, kimonochilikiu in onkan Tlatilolko seme in teopixke inik mouikas, kimoyolkuitilitiu, iuan kimosenkauilitiu,
100 ye ika ka uel yuka in iyolo ka ye inman, ka ye onkan inik mikis ka aok meuas aokmo patis.
101 Au in Martes, uel ok tlatlayouatok in ompa ualkis ichan in Juan Diego in kimonochilis teopixki in ompa Tlatilolko,
102 au in ye asitiuits inauak tepetsintli Tepeyakak in ikxitlan kistika ojtli tonatiu ikalakiampa, in onkan yeppa kisani, kito:
103 «Intla san nikmelaua ojtli, manen nechualmottiliti is Siuapili, ka yeppa nechmotsikaluis inik nik uikilis tlaneskayotl in teopixkatlatoani, in yu onechmonauatili;
104 ma ok techkaua in tonetekipachol, ma ok nik nonochilitiuetsi in teopixki motolinia, in notlatsin amo sa kimochialitok».
105 Niman ik kontlakolui in tepetl; itsalan ontlekok yenepa sentlapal, tonatiu ikisayampa kisato, inik isiuka asitiu Mexiko inik amo kimotsikaluis in Iluikak Siuapili,
106 in momatti ka in ompa in otlakolo ka auel kimottilis in uel nouiampa motstilitika.
107 Kittak kenin ualmotemoui ikpak in tepetsintli ompa ualmotstilitok in ompa yeppa konmottiliani.
108 Konmonamikiliko in inakastlan tepetl, konmotsakuililiko, kimoluili:
109 «—Aux noxokoyou, kampa in tiyau; Kampa in titstiu »
110 Au in yeuatl kuix achi ik melelma Kuix nose pinauak kuix nose ik misaui, momauti
111 Ixpantsinko mopechtekak, kimotlapalui, kimoluili:
112 «Nochpochtsine, Noxokoyoue, Siuapile, maximopakiltitie, ken otimixtonalti Kuix tikmouelmachitia in motlasonakayotsin, Notekuiyoe, Nopiltsinsine
113 Niktekipachos in mixtsin in moyolotsin: ma xikmomachiltitsino, Nochpochtsine, ka uelanautok se momaseualtsin notla,
114 Uey kokolistli in itech omotlali; ka yeppa ik momikilis.
115 Au ok nonisiutiu in mochantsinko Mexiko, nokonnonochilis seme in itlasouan Totekuiyo in toteopixkauan, konmoyolkuitilitiu, iuan konmosenkauilitiu,
116 ka nel ye inik otitlakatke in tikchiako in tomikistekiu.
117 Au intla onokonneltilito, ka niman nikan okseppa niualmokuepas, inik nonyas nokonitkis in miiyotsin in motlatoltsin, Tlakate Nochpochtsine.
118 Ma xinechmotlapopoluili, ma ok ixkich xinechmopakkaijiyouilti kamo ik nimitsnokeluia, Noxokoyoue, Nopiltsine, ka niman mostla nikistiuetsikiu.»
119 Au in oyukimokakiti itlatol in Juan Diego kimonankili in Iknouakasenkiskaichpochtsintli:
120 «Maxikkaki, ma uel yu ye in moyolo, noxokoyou, maka tle tlein mitsmauti, mitstekipacho, makamo ken mochiua in mix in moyolo makamo xikimakasi in kokolistli, manose ok itla kokolistli, kokok teopouki.
121 ¿Kuix amo nikan nika nimonantsin ¿Kuix amo noseualotitlan, nekauyotitlan in tika ¿Kuix amo neuatl in nimopakkayelis Kuix amo nokuixanko nomamaluasko in tika ¿Kuix ok itla in motech moneki
122 Makamo ok itla mitstekipacho, mitsamana, makamo mitstekipacho in ikokolis motlatsin, kamo ik mikis in axkan itechka; ma uel yu ye in moyolo ka ye opatik».
123 (Au ka niman uel ikuak patik in itlatsin in yu santepan machistik.)
124 Au in Juan Diego in oyukikak in iiyotsin in itlatoltsin in Iluikak Siuapili, uel senka ik omoyolali, uel ik pachiu in iyolo.
125 Au kimotlatlautili inik ma sa ye kimotitlanili inik kittatiu in Tlatoani Obispo in kitkilis itla ineska, in ineltika, inik kineltokas.
126 Au in Iluikak Siuapili niman ik kimonauatili inik ontlekos in ikpak tepetsintli, in onkan kanin yeppa konmottiliaya;
127 Kimoluili: «—Xitleko, noxokoyou in ikpak in tepetsintli, au in kanin otinechittak iuan onimitsnanauati;
128 Onkan tikittas onok nepapan xochitl, xikteteki, xiknechiko, xiksentlali, ninam xik—ualtemoui, nikan nixpan xik—ualuika».
129 Au in Juan Diego niman ik kitlekaui in tepetsintli.
130 Au in oasito ikpak, senka kimauiso in ixkich onok, xotlatok, kuepontok in nepapan kaxtilan tlasoxochitl, in ayamo imochiuyan,
131 ka nel uel ikuak in motlapaltilia issetl;
132 uel senka auiaxtok, iuki in tlasoepyolotli inik youalauachyotok;
133 Niman ik peu in kiteteki, uel moch kinechiko, kikuixanten.
134 Au in onkan ikpak tepetsintli, ka niman atle xochitl in imochiuyan, ka texkala, netsola, uiuitstla, nopala, miskitla;
135 au intla xiutotontin mochichiuani, in ikuak in ipan Metstli Disiembre, ka moch kikua kipopoloua issetl,
136 Au ka niman ik ualtemok, kiualmotkilili in Iluikak Siuapili in nepapan xochitl okitetekito,
137 au in oyukimottili, imatikatsinko konmokuili;
138 niman ye okseppa ikuexanko kiualmotemili kimoluili:
139 «—Noxokoyou, inin nepapan xochitl yeuatl in tlaneltilis in neskayotl in tik—uikilis in Obispo.
140 Nopampa tikiluis ma ik kitta in notlanekilis iuan ik kineltilis in notlanekilis, in nosialis.
141 Au in teuatl in tinotitlan ka uel motech netlakanekoni;
142 Au uel nimitstlakuaunauatia san uel isel ixpan Obispo tiksouas in motilma, iuan tiknextilis in tlein tik—uika:
143 Au uel moch tikpouilis, tikiluis in kenin onimitsnauati inik titlekos in ikpak tepetsintli in tiktetekitiu xochitl, iuan in ixkich otikittak, otimauiso,
144 inik uel tikyoloyeuas in Teopixkatlatoani inik niman ipan tlatos inik mochiuas, moketsas in noteokal onikitlanili.»
145 Au in okonmonanauatili in Iluikak Siuapili kiualtokak in kuepotli Mexiko ualmelaua, ye paktiuits.
146 Ye yu yetiuits in iyolo ka yekkisakiu, kiyekitkis.
147 Uel kimokuitlauitiuits in tlein ikuixanko yetiuits in manen itla kimakau;
148 kimotlamachtitiuits in iauiaka in nepapan tlasoxochitl.
149 In oasiko itekpanchan Obispo konnamikito in ikalpixkau iuan oksekin itlanenkauan in Tlatokateopixki.
150 Au kintlatlauti inik ma kimoluilikan in kenin kimottilisneki, yese ayak seme kinek, amo konmokakkaneke aso ye inik uel ok youatsinko.
151 au anose inik ye kiximatti san kintepachoa inik imixtlan pilkatinemi,
152 iuan ye okinonotske in imikniuan in kipoloto in iquak kitepotstokake.
153 Uel uekautika in otlatolchixtikatka.
154 Au in okittake ye uel uekautika in onkan ikak, motololtitikak, tlatenmatikak in aso notsalos, iuan in iukinma itla kiualitki, kikuixanotikak; niman ye ik itech onasike inik kittiliske tlein kiuikats inik inyolo pachiuis.
155 Au in okittak in Juan Diego ka niman auel kintlatilis in tlein kiuikats, ka ik kitoliniske kitotopeuaske nose ik kimiktiske, tepiton kiualnexti ka xochitl.
156 Au in yukittake ka moch kaxtilan nepapan xochitl iuan in kamo imochiuyan in ikuak, uel senka kimauisoke, iuan in kenin uel senka seltik, inik kueponki, inik auiak, inik mauistik.
157 Au keleuike inik keskitetl konanaske, kikixtiliske;
158 au uel expa mochiuki inik motlapaloke konkuiskia; niman auel mochiuki,
159 yeika in ikuak kiitskiskia aokmo uel xochitl in kittaya, san yukima tlakuiloli, nose tlamachtli, nose tlatsontli in itech kittaya tilmatli.
160 Niman ik kimoluilito in Tlatoani Obispo in tlein okittake;
161 iuan in kenin kimottilisneki in maseualtsintli ye iskipa ualau, iuan in ye uel uekau in ye ik aso onka tlatlatolchixtok inik kimottilisneki.
162 Au in Tlatoani Obispo in oyu kimokakiti, niman ipan ya in iyolotsin ka yeuatl in ineltika inik iyolotsin masis, inik kimoneltililis in tlein ik nemi tlakatsintli.
163 Niman motlanauatili inik niman kalakis, kimottilis.
164 Au in okalak ixpantsinko mopechtekak, in yu yeppa kichiuani;
165 au okseppa kimotlapouilili in ixkich okittak in okimauiso iuan in inetitlanis.
166 Kimoluili: «—Notekuiyoe, Tlatoanie, ka ye onikchiu, ka ye onikneltili in yu otinechmonauatili,
167 ka uel yu oniknoluilito in Tlakatl in Notekuiyo in Iluikak Siuapili Santa Maria in Teotl Dios Itlasonantsin, in tikmitlania in tlaneskayotl inik uel tinechmoneltokitis, inik tikmochiuililis in iteokaltsin in onkan mitsmitlanililia, tikmokechilis;
168 au ka uel yu oniknoluili in onimitsnomakili in notlatol inik nimitsualnouikilis in itla ineska in ineltika in itlanekilistsin inik nomak otikmokauili.
169 Au ka okiuelmokakiti in miiyotsin in motlatoltsin; au okimopakkaselili in tikmitlania in itla ineska, ineltika, inik mochiuas moneltilis in itlanekilistsin.
170 Au ye in in axkan ok youatsinko onechmonauatili inik oksepa nimitsnottilikiu;
171 au oniknitlanilili in itla ineska inik nineltokos, in yu onechmoluili nechmomakilis, au ka san niman okimoneltilili.
172 Au onechmiuali in ikpak tepetsintli in kanin yeppa nokonnottiliani inik ompa niktetekitiu in nepapan Kaxtilan xochitl.
173 Au in oniktekito, onichualnouikilili in onkan tlatsintlan;
174 au ka imatikatsinko konmokuili,
175 okseppa nokuixanko okonualmotemili,
176 inik nimitsualnotkililis, in uel Teuatsin nimitsnomakilis.
177 Masiui in ka uel nikmattia kamo imochiuyan xochitl in ikpak tepetsintli, ka san tetexkala, netsola, uitstla, tenopala, miskitla amo ik oninotsotson, amo ik nomeyoloak.
178 In nasito in ikpak tepetsintli in nitlachix ka ye xochitlalpan.
179 Onkan senkistok in ixkich nepapan tlasoxochitl kaxtilankayotl auach, tonameyotok, inik niman oniktetekito.
180 Au onechmoluili inik ipampa nimitsnomakilis; au ka ye yu nik neltitlia inik onkan tikmottilis in itla neskayotl in tikmitlanilia inik tikmoneltililis in itlanekilistsin;
181 iuan inik nesi ka neltilistli in notlatol, in nonetitlanis:
182 Ka iska, ma xikmoselili.»
183 Au ka niman ik kiualsou in istak itilma in okikuixanotikaka xochitl.
184 Au in yu ualtepeu in ixkich nepapan kaxtilan xochitl,
185 niman onkan momachioti, nestikis in itlasoixiptlatsin is senkiska Ichpochtli Santa Maria Teotl Dios Inantsin in yukatsintli axkan moyetstika,
186 in onkan axkan mopixtsinotika in itlasochantsinko in iteokaltsinko Tepeyakak, motokayotia Guadalupe.
187 Au in oyukimottili in Tlatoani Obispo iuan in ixkichtin onkan katka motlankuaketske, senka kimauisoke,
188 kimotstimoketske, tlaokoxke, moyoltoneuke, yukin ajkoya in inyolo in intlalnamikilis…
189 Au in Tlatoani Obispo chokistika, tlaokoyalistika kimotlatlautili, kimitlanilili in itlapopoluililoka inik amo niman okineltili, in itlanekilistsin, in iiyotsin in itlatoltsin.
190 Au in omokets kiualton in ikechtlan ik ilpitikatka in itlaken, in itilma Juan Diego.
191 in itech omonexiti in onkan omomachiotitsino in Iluikak Siuapili.
192 Au niman ik kimouikili; ompa kimotlalilito in ineteochiuayan.
193 Au ok onka osemiluiti in Juan Diego in ichantsinko Obispo, ok kimotsikalui.
194 Au in imostlayok kilui: «—Sake, inik tikteittitis in kanin itlanekilistsin Iluikak Siuapili kimokechililiske in iteokaltsin.»
195 Niman ik tetlaluilok inik mochiuas moketsas.
196 Au in Juan Diego in oyukitteititi in kanin kimonauatili in Iluikak Siuapili moketsas iteokaltsin, niman ik tenauati:
197 in ok onasisneki in ichan inik konittatiu in itlatsin Juan Bernardino, in uelanautok, in ikuak kiualkauteuak seme kinotsaskia Teopixke in onkan Tlatilolko, inik kiyolkuitiskia, kisenkauaskia; in kimoluili Iluikak Siuapili in ye opatik.
198 Au amo san isel kikauke yas, ka kiuikake in ompa in ichan;
199 Au in oyu asito kittake in itlatsin ye uel paktika, niman atle kikokoa,
200 Au in yeuatl senka kimauiso in kenin imach ualuiko, iuan senka mauistililo;
201 kitlatlani in imach tleika in yuki chiualo, in senka mauistililo:
202 Au in yeuatl kilui in kenin ikuak ompa ualeuak in kinochiliskia teopixki in kiyolkuitis, kisenkauas, in onkan Tepeyakak kimottilitsino in Iluikak Siuapili;
203 au kimotitlani in ompa Mexiko in kittatiu in Tlatoani Obispo inik onkan kimokaltilis in Tepeyakak.
204 Au kimoluili in makamo motekipacho in ka ye paktika; in ik senka moyolali.
205 Kilui in itlatsin ka ye neli ka niman ikuak in kimopatili,
206 iuan uel kimottili is san no uel ye iukatsintli in yu kimottititsinoaya in imach,
207 iuan kimoluili in kenin yeuatl ok okimotitlanili Mexiko in kittas Obispo;
208 Au ma no in ikuak kittatiu, ma uel moch ik kixpantis kinonotsas in tlein okittak,
209 iuan in kenin tlamauisoltika okimopatili;
210 au ma uel yu kimotokayotilis, ma uel yumotokayotitsinos is senkiska Ichpochtsintli Santa Maria de Guadalupe in itlasoixiptlatsin.
211 Au niman ik kiualuikake in Juan Bernardino in ixpan Tlatouani Obispo in kinonotsako, in ixpan tlaneltiliko.
212 Au ineuan in imach Juan Diego kinkaloti in ichan Obispo achi keskiluitl,
213 inok ixkich ika moketsino iteokaltsin Tlatoka Siuapili in onkan Tepeyakak in kanin kimottitili in Juan Diego.
214 Au in Tlatouani Obispo kikuani ompa in Iglesia Mayor in itlasoixiptlatsin in Iluikaktlasosiuapili.
215 Kiualmokixtili in ompa itekpanchan in ineteochiuayan moyetstikatka: inik mochi tlakatl kittas kimauisos in Itlasoixiptlatsin.
216 Au uel senmochi is semaltepetl olin, in kiualmottiliaya, in kimauisoaya in Itlasoixiptlatsin.
217 Ualateomatia,
218 kimotlatlautiliaya.
219 Senka kimauisoaya in kenin teotlamauisoltika inik omonexiti,
220 inik niman ma aka tlaltikpak tlakatl okimikuilui in itlasoixiptlayotsin.
No hay comentarios:
Publicar un comentario